Во рамките на Месецот на гордоста на ЛГБТ+ луѓето - кога ширум светот се организираат настани во знак на сеќавање на стоунволските демонстрации, првиот бунт на ЛГБТ+ заедницата и нејзините поддржувачи против систематскиот прогон на сексуалните малцинства, што се случија во Њујорк при крајот на месец јуни во 1969 година и претставуваат пресвртна точка во поставувањето на темелите на ЛГБТ+ движењето, односно борбата за еднаквост и почитување на човековите права и слободи на ЛГБТ+ луѓето - ви најавуваме

Филмска проекција на „Пријателка“

27 јуни 2019

20:00 часот (82 минути)

Кино Милениум

Билетите се бесплатни

Скопски филмски фестивал и Млади артивисти за промена во соработка со Здружението за културен и медиумски активизам КВИР СКВЕР од Скопје организираат проекција на играниот филм „Пријателка“, кој ни ги доближува проблемите и предизвиците со кои се соочуваат геј-луѓето во општество каде истополовата љубов е забранета, а хомосексуалноста е кривично дело за кое следува затворска казна од 5 до 14 години.

Како до билети?

НАПОМЕНА: Билетите се достапни на принципот „прв дојден, прв услужен“.

Бесплатните билети можете да ги подигнете на билетарницата на кино МИЛЕНИУМ, почнувајќи од 20 јуни 2019. Капацитетот на киносалата е 510 седишта. Со оглед на тоа дека станува збор за еднократна филмска проекција, ве молиме подигнете ги билетите навреме.

Заради фер распределба на билетите и шанса да се погледне филмот, подигнете само онолку билети колку што реално ви се потребни.

Градското кино МИЛЕНИУМ е лоцирано на првиот кат во Градскиот трговски центар во Скопје. Работното време на билетарницата е секој работен ден од 14:00 до 22:00 часот и викенди од 10:30 до 22:30 часот. Телефон за контакт: +389 2 3120 389.

За филмот

Забранет во Кенија, прифатен од светот

„Пријателка“ („Rafiki“) е кениски драмски филм во режија на Ванури Кахиу. „Пријателка“ е приказна за пријателството и деликатната љубов која се развива меѓу две млади жени, Кена и Зики, и покрај семејните и политичките притисоци околу правата на ЛГБТ+ луѓето во Кенија.

Филмот ја имаше својата интернационална премиера во програмата „Un Certain Regard“ (во превод „одреден поглед“ или „од друга гледна точка“) во рамките на Канскиот филмски фестивал во 2018 година; инаку тоа беше првиот кениски филм прикажан на фестивалот.

„Добрите кениски девојки стануваат добри кениски сопруги“, но Кена и Зики копнеат за нешто повеќе. И покрај политичкото ривалство меѓу нивните семејства, девојките истрајуваат и остануваат блиски пријателки, поддржувајќи се меѓусебно во следењето на своите соништа во конзервативно општество. Кога љубовта процветува меѓу нив, тие ќе бидат приморани да направат избор меѓу среќата и безбедноста.

Дали знаевте?

Акронимот ЛГБТ+ се однесува на лезбијки, геј-мажи, бисексуални и трансродови луѓе.

„Сите човечки суштества се раѓаат слободни и еднакви по достоинство и права. Тие се обдарени со разум и совест и треба да се однесуваат еден кон друг во духот на општочовечката припадност“, се вели во членот 1 од Универзалната декларација за човековите права.

Според член 5 од новиот Закон за спречување и заштита од дискриминација изгласан во парламентот во 2019 година, а во кој се дефинираат дискриминаторските основи, „се забранува секоја дискриминација врз основа на раса, боја на кожа, потекло, национална или етничка припадност, пол, род, сексуална ориентација, родов идентитет, припадност на маргинализирана група, јазик, државјанство, социјално потекло, образование, религија или верско уверување, политичко уверување, друго уверување, попреченост, возраст, семејна или брачна состојба, имотен статус, здравствена состојба, лично својство и општествен статус или која било друга основа“. За физичките и правните лица кои ќе сторат прекршок се предвидени парични казни кои можат да достигнат и до 5000 евра во денарска противвредност.

Говорот на омраза и делата од омраза против физичко лице мотивирани од реалната или претпоставената сексуална ориентација или родов идентитет на лицето се сметаат за кривично дело согласно Кривичниот законик и, соодветно, се казнуваат со затвор.

Настанот се организира во рамките на проектот „Млади артивисти за промена“, кој е финансиски поддржан од Амбасадата на Холандија во Северна Македонија.