Македонија се најде на 31-во место на виножитната мапа на водечката европска ЛГБТИ организација ИЛГА-Европа, во која се рангирани 49 европски земји според правната и политичката ситуација со човековите права на ЛГБТИ луѓето. Повеќето држави аспиранти за влез во Европска Унија, вклучително нашата земја, заостануваат во исполнувањето на обврските, одложувајќи го носењето на закони и со тоа ставајќи ги своите граѓани сѐ повеќе во реален ризик од негативни реакции кон нив и поткопување на фундаменталните права.
На виножитната мапата најдобро котираат Малта (88%) на прво, Исланд (83%) на второ и Белгија (78%) на трето место, додека најлоши оценки имаат Русија (2%), Азербејџан (2%) и Турција (5%).
Македонија има остварено само 31% од потребните реформи за унапредување на позицијата и пристапот до човековите права на ЛГБТИ луѓето, а од државите во регионот полошо од нас се рангирани Бугарија со 23% и Романија со 19%. Србија, Косово и Албанија имаат по 36%, Босна и Херцеговина 40%, Црна Гора 48%, Словенија и Хрватска 50%, додека Грција е пред останатите држави на Балканот со 71% и моментално се наоѓа на шесто место во Европа заедно со Финска.
И додека европските земји се соочуваат со обиди за поткопување на слободата и демократијата во услови пораст на крајнодесничарските сили, наодите од најновата ЛГБТИ анкета на Агенцијата на Европската Унија за фундаментални права спроведена и кај нас откриваат дека повеќе од две третини од испитаниците се соочиле со изјави на омраза и значително зголемување на насилството од претходното истражување во 2019 година.
За повеќе информации консултирајте го новиот сајт на виножитната мапа со клик овде.
