Oд продуцентите на филмовите „Џеки“ (Jackie), „Под лупа“ (Spotlight) и „Тони Ердман“ (Toni Erdmann) и режисерот на филмовите „Глорија“ (Gloria) и „Непослушност“ (Disobedience), а во соработка со дистрибутерската куќа Fox Vision од Белград, Србија, ви најавуваме филмска проекција на „Фантастична жена“.

Здружението за културен и медиумски активизам КВИР СКВЕР од Скопје, по повод Меѓународниот ден на човековите права, организира премиерна проекција во Македонија на чилеанскиот филм „Фантастична жена“, овогодишниот добитник на Оскар за најдобар филм од странско говорно подрачје, ставајќи акцент на проблемите и предизвиците со кои се соочуваат трансродовите луѓе.

За филмот

Приказна за Марина, келнерка и пејачка, и Орландо, постар маж, кои се заљубени и ја планираат иднината заедно. Откако Орландо ненадејно се разболува и починува, Марина е принудена да се соочи со неговото семејство и општеството, и повторно да се бори како би им покажала која е таа: комплексна, силна, директна, фантастична.

Синопсис

Некаде во Сантјаго (главниот град на Чиле) во слабо осветлен ноќен клуб, им се сретнуваат погледите на Орландо, љубезен и богат сопственик на текстилна компанија и Марина, надежна пејачка и речиси двојно помлада љубов на неговиот живот. Но, за жал, по прославата на роденденот на Марина и страстната ноќ помината заедно, на Орландо сериозно му се влошува здравствената состојба – и до утрото – тој умира во болница. Соочена со прераната смрт на нејзиниот партнер, Марина наскоро ќе сфати дека, од сега па натаму, сѐ се доведува во прашање: нејзината инволвираност во смртта на Орландо, нивната неконвенционална врска; и пред сè, нејзиното право да го оплакува својот починат сакан. На крајот, што е злочинот на Марина; кое е тоа толку грозоморно дело што би ја лишило оваа фантастична жена од нејзината почит, нејзиното достоинство и, конечно, нејзиниот идентитет?

Како до билети?

Бесплатните билети можете да ги подигнете на билетарницата на градско кино МИЛЕНИУМ во Скопје. Капацитетот на киносалата е 510 седишта. Со оглед на тоа дека станува збор за еднократна филмска проекција, ве молиме подигнете ги билетите навреме. Билетите се достапни на принципот „прв дојден, прв услужен“. Заради фер распределба на билетите и шанса да се погледне филмот, подигнете само онолку билети колку што реално ви се потребни.

спонзори и соработници

Огромна благодарност до сите наши партнери за нивниот придонес.