Премини до содржината Премини до подножјето

По повод Меѓународниот ден на човековите права, 10 декември, Собранието на Република Северна Македонија во соработка со Националната мрежа против хомофобија и трансфобија ја одржа конститутивната седница на Интерпартиската парламентарна група за унапредување на правата на ЛГБТИ луѓето. Прв пат оваа група беше формирана во мандатот на претходниот парламентарен состав. Во групата учество ќе земат повеќе пратеници и пратенички од власта и од опозицијата кои во соработка со здруженијата на граѓани ќе се застапуваат во законодавниот дом за унапредување на правата на ЛГБТИ луѓето. Досега повеќе од десет пратеници се приклучија во групата, но во периодот кој следува се очекува бројот да се зголеми.

Конститутивна седница на Интерпартиската парламентарна група во Собранието на Република Северна Македонија за унапредување на правата на ЛГБТИ луѓето

Координаторката на групата, Маја Морачанин, пратеничка од Зелената партија ДОМ изјави:

„Ми претставува огромно задоволство што во овој мандат повторно ја формираме неформалната Интерпартиска парламентарна група за унапредување на правата на ЛГБТИ луѓето и, воедно, чест што повторно ја добив довербата да бидам координаторка на групата. Во изминатите три години постигнавме значајни исчекори во унапредување на правата на ЛГБТИ луѓето. Во претходниот мандат се застапувавме за донесување на Законот за спречување и заштита од диркиминација, ги внесовме сексуалната ориентација и родовиот идентитет во Законот за аудио и аудио-визуелни медиумски услуги и во Кривичниот законик како основи за заштита од кривични дела од омраза. Групата учествуваше и во бројни активности за промоција на правата на ЛГБТИ луѓето, како кампањата „Не суди кој кого љуби“, одбележување на Меѓународниот ден за борба против хомофобијата и трансфобијата, учество на Парадата на гордоста во Скопје и многу други. На иницијатива на ЛГБТИ групата, Министерството за надворешни работи презеде постапки за приклучување на Република Северна Македонија во меѓувладината Коалиција за еднакви права (ERC) и нѐ информираше дека од 31 мај 2019 г. нашата држава и формално е членка на коалицијата“.

Професорката Гордана Силјановска Давкова, пратеничка од опозицијата изјави:

„Да потсетам, правото на среќа е едно од првите лични права, гарантирано во Декларацијата за независност на САД од 1776 година и во француската Декларација за правата на човекот и граѓанинот од 1789 година. Среќни сме кога живееме по СВОЕ. И ЛГБТИ личностите имаат право да живеат по НИВНО, како што јас имам право да живеам по МОЕ. Мора да изградиме демократска парламентарна брана против вербалните и физичките напади врз личностите од ЛГБТИ заедницата, мора да им овозможиме да станат СУБЈЕКТИ, наместо објекти, мора да ги прифатиме како рамноправни.  Како пратеничка, иницијаторка и членка на Интерпартиската парламентарна група за унапредување на правата на ЛГБТИ луѓето, порачувам: Ние, пратениците од различни пратенички групи и партии ги претставуваме сите граѓани, вклучувајќи ги и ЛГБТИ индивидуите и имаме уставна, законска и етичка, пратеничка и човечка обврска да се бориме против кој било облик на дискриминација, сторена кон која било индивидуа, без оглед на каква било припадност“!

Конститутивна седница на Интерпартиската парламентарна група во Собранието на Република Северна Македонија за унапредување на правата на ЛГБТИ луѓето

Драгана Дрндаревска од Националната мрежа против хомофобија и трансфобија изјави:

„Иако бележиме унапредување на правата на ЛГБТИ луѓето, овој парламентарен состав мора да продолжи со овој тренд. Изгласувањето на Законот за спречување и заштита од дискриминација беше првиот чекор, но пред Собранието се наоѓа подеднакво важна задача да изберат професионални и независни членови на Комисијата за спречување и заштита од дискриминација кои ефикасно ќе ги штитат од дискриминација сите маргинализирани групи, помеѓу кои и ЛГБТИ луѓето. Понатаму, претстои и изборот на нов Народен правобранител, кој исто така бараме да биде независен професионалец со цел реформирање на институцијата и обезбедување на поефикасна заштита на човековите права на граѓаните, кога тие се прекршени од страна на државата. Заштитата од кривични дела од омраза мора да се унапредува преку зајакнување на капацитетите на полицијата и обвинителството, бидејќи и покрај законските измени не бележиме значајни унапредувања во практиките на овие институции. Правата на ЛГБТИ луѓето се човекови права, а нивното остварување значи намалување на стигмата и омразата кон оваа заедница што може да се постигне само преку континуирани активности и мерки од страна на сите надлежни институции“.

МРЕЖИ И ПАРТНЕРИ

 
ILGA World – The International Lesbian, Gay, Bisexual, Trans and Intersex Association
ILGA-Europe
LGBTI Equal Rights Association for Western Balkans and Turkey
Национална мрежа против хомофобија и трансфобија
Skopje Pride
Microsoft
Powered by Project Galileo
WPML
Canva
The Events Calendar
 

Организација-членка на Меѓународната асоцијација на лезбијки, геј мажи, бисексуални, трансродови и интерсексуални лица, Асоцијацијата за еднакви права за ЛГБТИ луѓето во Западен Балкан и Турција и Националната мрежа против хомофобија и трансфобија

КВИР СКВЕР Скопје © 2024. Сите права се задржани.
Твојата поддршка ни значи!
Направи парична донација
Донирај